KellyJackie参加双截棍赛 练到手指肿

九龙湾今日举行《2015年第十届香港国际武术比赛》，有成十几个国家喜欢武术嘅人士参加，KellyJackie参加双截棍赛事，今年系第二年参加呢个比赛，全程表演得唔错，KellyJackie比赛分三段进行唔同嘅招式，平均分都有成8点几，旧年5月先开始学，似乎学得唔错!

不过，KellyJackie练习嗰阵，唔小心打到自己，佢话：「我当下觉得自己个手指公系冇咗，feel唔到，因为好痛，但系练习紧，我就继续试，睇吓自己忍痛嘅能力去到边，完咗十几秒嘅动作，手指公已经肿咗，敷冰喇!我觉得慢慢可以训练到我唔怕痛，同埋坚持，几似唱歌咁，靠自己临场表现。」

KellyJackie更指，今次参赛压力比较大啲，师傅要佢「第三级跳」做一个「level 3」嘅动作，支棍要做多啲离手转动嘅动作，怕跌棍，反而「level 2」嘅动作就考起佢，仲话之前自己仲系黄带，遴啲考埋蓝带试。

KellyJackie坦言：「未考嘅!要等师傅觉得过唔过到关先，我觉得level 2难，我头先有示范过好多哼脚板、然后转身离地跳高嘅动作，对于初班学生嚟讲，系一个几大挑战。」

佢仲话套路可能系几分钟，但系佢一日练成三、四个钟，几百次不停扭，KellyJackie觉得自己条腰同上半身分开咗，好似女性周期不适，背脊好痛，不过唔系痛七日，系keep住痛，瞓觉侧身都好似婆婆咁。

KellyJackie又话，觉得自己表现合格，仍有好大进步空间，问起今年有冇信心攞奖，佢称：「信心系有嘅!level 3动作系8.8分、破风八棍系8.65分，level 2就8.4分，我都好惊喜，因为满分系10分，因为国际水平8.5分以上，系比较高度嘅评价，自己都好开心，成绩算中等，完咗之后自己都会返去练多啲紮马，依家成日拉筋，真系帮助好多。」

另外，KellyJackie仲话自己感染咗约6岁嘅表姨甥熹熹去学双截棍，有次同表姨甥上武馆，畀佢睇下啲师兄压腿好辛苦，被棍扑亲会痛，临走时佢个表姨甥都坚持要报名，每次返屋企都有练习。                                

李连杰恩师吴彬(中)。